រដ្ឋាភិបាលបញ្ជាទៅអាជ្ញាធរមីន និងស្ថាប័នពាក់ព័ន្ធពង្រឹងការអនុវត្តកម្មវិធីអប់រំប្រជាពលរដ្ឋទូទៅ ដែលរស់នៅក្នុងតំបន់រងផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម ដោយថាដើម្បីទប់ស្កាត់និងកាត់បន្ថយចំនួនអ្នកគ្រោះថ្នាក់។
ក្នុងសារលិខិតនៅថ្ងៃទី២៤ ខែកុម្ភៈ ឆ្នាំ២០១៧នេះ ជាថ្ងៃប្រារព្វទិវាជាតិយល់ដឹងពីមីន លើកទី១៨ លោកនាយករដ្ឋមន្ត្រី ហ៊ុន សែន បានបញ្ជាទៅអាជ្ញាធរមីន ត្រូវសហការជាមួយអាជ្ញាធរដែនដី កងកម្លាំងប្រដាប់អាវុធ ប្រតិបត្តិការ និងលើកទឹកចិត្តប្រតិបត្តិករសកម្មភាពមីន និងអង្គការពាក់ព័ន្ធត្រូវគំាទ្រ និងអនុវត្តន៍កម្មវិធីអប់រំប្រជាពលរដ្ឋទូទៅ នៅតាមផ្ទះ សហគមន៍ ដែលងាយរងគ្រោះថ្នាក់ ឲ្យបានយល់ពីហេតុផលដែលរងគ្រោះនិងផលវិបាកនៃគ្រោះថ្នាក់ ព្រមទំាងមានវិធានការឲ្យបានតឹងរឹងចំពោះអ្នកលេង ឬកែច្នៃគ្រាប់ដែលតែងតែបង្កឲ្យមានគ្រោះថ្នាក់។
លើសពីនេះទៀត លោក ហ៊ុន សែន បានបញ្ជាឲ្យស្ថាប័នពាក់ព័ន្ធធ្វើការផ្សព្វផ្សាយទូលាយតាមវិទ្យុ និងទូរទស្សន៍ ផ្ទំាងប៉ាណូ ខិត្តប័ណ្ណ ការបញ្ជូលសារអប់រំពីមីននៅក្នុងកម្មវិធីសិក្សារ ព្រមទំាងអនុវត្តច្បាប់គ្រប់គ្រងអាវុធជាតិផ្ទុះ និងវិធានការរដ្ឋបាលនានាថែមទៀត។
ចាប់ពីឆ្នាំ១៩៩២ ដល់ឆ្នាំ២០១៦ សកម្មភាពបោសសំអាតមីន បានរំដោះដីមានមីនបានជាង១៥០០គីឡូម៉ែត្រក្រឡា ប៉ុន្តែអាជ្ញាធរមីន ថា កម្ពុជានៅមានផ្ទៃដីដែលសង្ស័យថាមានមីន និងគ្រាប់យុទ្ធភ័ណ្ឌមិនទាន់ផ្ទុះប្រមាណជាង១៩៤៦គីឡូម៉ែត្រក្រឡាទៀត ដែលត្រូវធ្វើការបោសសំអាតពីឆ្នាំ២០១៧ ដល់២០២៥ និងត្រូវការថវិកាប្រមាណ៤០៦លានដុល្លារ៕