សមត្ថកិច្ចខណ្ឌ សែន សុខ ឲ្យដឹងថា ពួកគេបានឃាត់ខ្លួនមនុស្សម្នាក់ ពាក់ព័ន្ធទៅនឹងការធ្វេសប្រហែសបណ្តាលឲ្យផ្ទុះឡចំហាយទឹក ដែលបណ្តាលឲ្យមនុស្សម្នាក់ស្លាប់និងរងរបួស៧នាក់ទៀតនៅរោងចក្រ ស៊ិន តៃ កាលពីថ្ងៃទី២២មីនា។
អធិការនគរបាលខណ្ឌ សែន សុខ លោក ម៉ក់ ហុង បានឲ្យវីអូឌីដឹងនៅព្រឹកថ្ងៃទី២៤មីនានេះថា រហូតមកដល់ពេលនេះសមត្ថកិច្ចបានឃាត់ខ្លួននិងបញ្ជូនមនុស្សម្នាក់ទៅតុលាការរួចហើយ ដែលថាបានធ្វេសប្រហែលបណ្តាលឲ្យមានការគ្រោះថ្នាក់ផ្ទុះឡចំហាយទឹកនេះ។ ទោះជាយ៉ាងណា លោកមិនបានបញ្ជាក់បន្ថែមពីអត្តសញ្ញាណ អ្នកដែលត្រូវបានសមត្ថកិច្ចឃាត់ខ្លួននោះទេ ដោយឆ្លើយថាពុំមានឯកសារក្នុងដៃ។
លោកថា៖ «អ្នកធ្វេសប្រហែសគឺយើងឃាត់ខ្លួនបញ្ជូនទៅតុលាការ […] តែម្នាក់ទេ អ្នកធ្វេសប្រហែសមានតែមួយតើ មានអ្នកណាទៀត!»។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារនិងសិទ្ធិមនុស្សលោក មឿន តុលា កាលពីថ្ងៃទី២២ បានឲ្យវីអូឌីដឹងថា ករណីដែលផ្ទុះឡចំហុយបណ្តាលឲ្យមនុស្សស្លាប់និងរងរបួសនេះ អាចកើតឡើងដោយសារការធ្វេសប្រហែលរបស់អាជ្ញាធរច្រើនជាង ដោយថាអាជ្ញាធរមិនបានពិនិត្យឲ្យបានដិតដល់នៅពេលចុះធ្វើអធិការកិច្ចនៅក្នុងរោងចក្រ។
លោក មឿន តុលា បញ្ជាក់ថា ដើម្បីទប់ស្កាត់បញ្ហានេះឲ្យមានប្រសិទ្ធភាព ក្រុមអធិការកិច្ចត្រូវពិនិត្យជាប្រចំាចំពោះឡចំហុយនៅតាមរោងចក្រទំាងអស់ ដើម្បកុំឲ្យមានរឿងនេះ កើតឡើងបន្តទៀត។
លោកយល់ថា៖ «ពិនិត្យគុណភាពឡចំហុយ ជាប្រចំាថាវាយល់ល្អថា ត្រូវត្រួតពិនិត្យវារៀងរាល់អាទិត្យរៀងរាល់ថ្ងៃថាតើវាមានភាពប្រក្រតីអីខ្លះ ចំពោះឡចំហុយ ព្រោះយើងគួរតែគិតគូអំពីប្រព័ន្ធការពារប្រសើរជាងប្រព័ន្ធព្យាបាលហើយកុំអាងថាពេលដែលស្លាប់ទៅមានប.ស.សជាអ្នកចេញ ឬក៏មានប.ស.សជាអ្នកគ្រប់គ្រងទៅលើគ្រួសារអី វាជារឿងមួយល្អប្រសើរ ក៏ប៉ុន្តែជីវិតមនុស្សមិនមែនយើងចេះតែយកទៅលេងសើចទេ […]»។
ក្រោយកើតហេតុភ្លាមៗនោះ បេឡាជាតិរបបសន្តិសុខសង្គម កាលពីថ្ងៃ២២ ក៏បានចេញសេចក្តីប្រកាសព័ត៌មានមួយថាអ្នកស្លាប់និងរបួសទាំង៧នាក់នោះនឹងត្រូវបានក្រសួងការងារ ជួយដោះស្រាយទៅតាមគោលរបបសន្តិសុខសង្គមរបស់បេឡាជាតិរបបសន្តិសុខសង្គម។
ពាក់ព័ន្ធនឹងគ្រោះថ្នាក់ការងារ នេះមិនមែនជាលើកទីមួយទេ ដែលបេឡាជាតិរបបសន្តិសុខសង្គម ប្រកាសធានារ៉ាប់រងទៅលើអ្នកដែលរងគ្រោះ ហើយមានគ្រោះថា្នក់ការងារជាច្រើន ដែលកើតឡើងស្ទើរតែរាល់ខែ ពីគ្រោះថ្នាក់ចរាចរណ៍ ការដួលសន្លប់ ការបាក់អាគារជាដើម។ ហេតុការណ៍ ចេះតែបណ្តាលឲ្យមានគ្រោះថ្នាក់ការងារទាំងនេះត្រូវបានអ្នកធ្វើការក្នុងវិស័យការងារ អះអាងថា កើតមកពីការធ្វេសប្រហែសពីអ្នកពាក់ព័ន្ធ។
របាយការណ៍បូកសរុបការងារប្រចាំឆ្នាំ២០១៦ របស់ក្រសួងការងារបានឲ្យដឹងថា ក្នុងរយៈពេល១ឆ្នាំកន្លងទៅកម្មករដែលរងគ្រោះថ្នាក់ការងារ ដែលត្រូវបានបេឡាជាតិរបបសន្តិសុខសង្គមផ្តល់ការដោះស្រាយដល់ជនរងគ្រោះមានជាង១ម៉ឺន៥ពាន់នាក់ កើនលើសឆ្នាំ២០១៥ចំនួន៤៤%។
ប្រធានសហព័ន្ធសហជីពដើម្បីកម្មករលោក ប៉ាវ ស៊ីណា យល់ថាការកើនឡើងនេះ វាជាសញ្ញាដែលត្រូវឲ្យរដ្ឋាភិបាលមានវិធានការជាបន្ទាន់ ទៅលើការយកចិត្តទុកដាក់លើសុវត្ថិភាពកម្មករនេះ។ លោកថា ការចុះអធិការកិច្ចរបស់ក្រសួងការងារហាក់ដូចជាមិនទាន់ឆ្លើយតបបានចំពោះសុវត្ថិភាពរបស់កម្មករនោះទេ។ លោកទាមទារឲ្យមានការចុះត្រួតពិនិត្យឲ្យបានញឹកញាប់ ជាក់លាក់ និងហ្មត់ចត់បន្ថែមទៀតដើម្បីធានាថាសុវត្ថិភាពរបស់កម្មករត្រូវបានធានាបានច្រើន។
លោកថា៖ «វាអាស្រ័យទៅលើភាគីកម្មករ ឬក៏តំណាងកម្មករត្រូវរាយការណ៍បញ្ហានាយកជកគាត់មិនអនុវត្តន៍បញ្ជូនទៅអធិការ ដើម្បីឲ្យគេមកចុះពិនិត្យ។ អាហ្នឹងបានគេធ្វើទៅរួច ធម្មតាទេគេមិនអាចដាក់សមត្ថកិច្ចគេនៅមើលការខុសត្រូវក្នុងរោងចក្រហ្នឹងទេ។ គេគ្រាន់តែឆ្លុះមើលពិនិត្យហើយគេរាបចំរបាយការណ៍ទៅវិញ ដូច្នេះអាហ្នឹងវាជាចំណុចមួយដែល ទាំងសហជីពទាំងកម្មករហ្នឹងត្រូវសហការគ្នាផ្តល់ព័ត៌មានមកកាន់អធិការកិច្ចដើម្បី ឲ្យពួកគាត់ចុះទៅត្រួតពិនិត្យរោងចក្រណាមួយដែលយើងរកឃើញថាមិនបានអនុវត្តន៍តាមតម្រូវការហ្នឹង»។
បើតាមលោក ប៉ាវ ស៊ីណា បញ្ហាប្រឈមនៃសុវត្ថិភាពកម្មករកម្ពុជាគឺពាក់ព័ន្ធនឹងបរិស្ថាននិងបរិក្ខាសុវត្ថិភាពនៃរោងចក្រ ការធ្វើដំណើរដែលប្រឈមនឹងគ្រោះថ្នាក់ច្រើន និងទីកន្លែងស្នាក់នៅរបស់កម្មករ ដែលបញ្ហាទាំងអស់នេះលោកស្នើឲ្យមានវិធានការជាបន្ទាន់ ដើម្បីធានាសុវត្ថិភាពកម្មករនៅកម្ពុជា និងរួមចំណែកកាត់បន្ថយហានិភ័យ និងគ្រោះថ្នាក់ការងារនានា៕