តំណាងពលរដ្ឋ១៥នាក់ដែលមានជម្លោះដីធ្លីមកខេត្តកោះកុងនៅថ្ងៃនេះ បានដាក់ញ្ញត្តិនៅក្រសួងបរិស្ថាននិង ខុទ្ទកាល័យនាយករដ្ឋមន្រ្តី ដើម្បីស្នើសុំឲ្យអោយមានការដោះស្រាយទំនាស់ដីធ្លីរវាងពួកគាត់និងក្រុមហ៊ុនចិន។
តំណាងបណ្ដាញសហគមន៍ដែលមានជម្លោះដីធ្លី អ្នកស្រីច្រាយ នីម ប្រាប់វីអូឌីនៅថ្ងៃនេះ ថាពលរដ្ឋចំនួន១៥ នាក់នោះ ជាតំណាងពលរដ្ឋ២១០គ្រួសារដែលកំពុងមានជម្លោះដីធ្លីជាមួយក្រុមហ៊ុនចិនយូញៀនឌីវេលឡុប មែនគ្រុប។ អ្នកស្រីបន្ត ថាពលរដ្ឋដែលមកពីឃុំកោះសេ្ដច ស្រុកគីរីសាគរ ខេត្តកោះកុងទាំងនោះចង់អោយភាគី ពាក់ព័ន្ធ កាត់ដីចំនួន៦០១៩ហិចតាពីក្រុមហ៊ុនចិននេះមកឲ្យពួកគាត់បានកាន់កាប់វិញ។
តំណាងប្រជាពលរដ្ឋបញ្ជាក់ប្រាប់ថាក្រសួងបរិស្ថាននិងខុទ្ទកាល័យលោកនាយករដ្ឋមន្រ្តីលោកនាយករដ្ឋមន្រ្តីហ៊ុន សែន បានទទួលយកញ្ញត្តិរបស់ពួកគាត់ហើយ ដោយឲ្យពួកគាត់រងចាំដំណោះស្រាយរយៈពេលមួយ សប្ដាហ៍។ តំណាងពលរដ្ឋទាំងនោះថាបើរយៈពេលមួយសប្ដាហ៍ក្រោយគាត់មិនទទួលបានដំណោះស្រាយទេ ប្រជាពលរដ្ឋដែលមានជម្លោះដីធ្លីទាំងអស់នឹងលើកគ្នាមកម្ដងទៀត។
រដ្ឋាភិបាលបានផ្ដល់ដីសម្បទានសេដ្ឋកិច្ចឲ្យក្រុមហ៊ុន ញូញៀន ឌិវេលឡុបមែន គ្រុប កាលពីថ្ងៃទី៩ ខែឧសភា ឆ្នាំ២០០៨ មានផ្ទៃដី ៣ម៉ឺន ៦ពាន់ហិកតារ នៅស្រុកបុទុមសាគរ និងស្រុកគីរីសាគរ ខេត្តកោះកុង ដើម្បីធ្វើការអភិវឌ្ឍពាណិជ្ជកម្ម និងរមណីយដ្ឋានទេសចរណ៍ស្របតាមស្តង់ដារអន្តរជាតិ។