ប្រធានគណបក្សសង្គ្រោះជាតិលោក កឹម សុខា ប្រកាសថា លោកនិងចុះចេញពីតំណែង បើលោកឈ្នះឆ្នោតនៅក្នុងឆ្នាំ២០១៨ខាងមុខ ហើយធ្វើការងារបំរើពលរដ្ឋមិនកើត។
លោក កឹម សុខា ថ្លែងបែបនេះ នៅខាងមុខអ្នកគាំទ្ររាប់ពាន់នាក់ ក្នុងយុទ្ធនាការឃោសនាបោះឆ្នោតឃុំសង្កាត់ នៅខេត្ដសៀមរាប កាលពីល្ងាចថ្ងៃទី២៥ខែឧសភា។
ប្រធានគណបក្សប្រឆាំងលោក កឹម សុខា មានប្រសាសន៍ថា បើគណបក្សប្រឆាំងឈ្នះឆ្នោតនៅឆ្នាំ២០១៨ ដឹកនាំរដ្ឋាភិបាល នឹងអនុម័តថវិកាជាតិ៥០ម៉ឺនដុល្លា ឲ្យដល់មូលដ្ឋាន ដើម្បីអភិវឌ្ឍន៍ឃុំសង្កាត់។ លោកថា លោក កែម ឡី បានផ្ដល់យោបល់ដល់លោកថា នៅពេលដែលគណបក្សប្រឆាំង ឈ្នះការបោះឆ្នោត នឹងទម្លាក់លុយកន្លះលានដុល្លានេះ ដល់ភូមិឃុំសង្កាត់ ទើបអាចជួយប្រជាពលរដ្ឋនៅតាមមូលដ្ឋាន ឲ្យបានរួចចាកផុតពីភាពក្រីក្រ។
លោក កឹម សុខា ក៏បានអំពាវនាវដល់អ្នកគាំទ្រគណបក្សសង្គ្រោះជាតិ ឲ្យមានការជឿជាក់លើគណបក្សនេះ ដោយលោកថា បើលោកជាប់ឆ្នោតខាងមុខ ហើយធ្វើការមិនកើត លោកនឹងចុះចេញពីតំណែងវិញ។
លោកបន្ដថា៖ «ខ្ញុំសុំអំពាវនាវដល់បងប្អូនជនរួមជាតិជឿជាក់ថា អ្វីដែលគោលនយោបាយគណបក្សសង្គ្រោះជាតិ ដែលយើងលើកឡើងមកនេះ ទាំង៥ចំណុចនេះ យើងធ្វើបានយើងគិតច្បាស់លាស់ហើយ យើងធ្វើបានក្នុងនាមគណបក្សសង្គ្រោះជាតិ ក្នុងនាមប្រធានគណបក្សសង្គោះជាតិ ខ្ញុំសន្សាថា គឺបងប្អូនផ្ដល់សិទ្ធិអំណាចបោះឆ្នោតឲ្យ២០១៨ យើងនឹងធ្វើជូនប្រជាពលរដ្ឋឲ្យបានជាដាច់ខាត បើធ្វើមិនបាន កឹម សុខា ចុះចេញពីតំណែង»។
វីអូឌី មិនអាចទាក់ទងអ្នកនាំពាក្យគណបក្សប្រជាជន លោក សុខ ឥសាន ដើម្បីសុំការឆ្លើយតបពីករណីនេះបានទេ ដោយលោកមិនលើកទូរស័ព្ទ។
អ្នកវិភាគបញ្ហាសង្គម លោក មាស នី វិភាគថា ការចុះចេញពីតំណែងជារឿងសមស្រប របស់មេដឹកនាំ ដែលមិនអាចបំរើពលរដ្ឋតាមការសន្យាបាននោះ ដោយលោកថា សូម្បីមេដឹកនាំបក្សនីមួយៗ ធ្វើការឃោសនាបោះឆ្នោត ហើយមិនជាប់ការបោះឆ្នោតពីរដងនោះ លោកថា ក៏ត្រូវប្ដូរមេដឹកនាំគណបក្សនោះដែរ។
លោកស្វាគមន៍ការប្រកាសរបស់លោក កឹម សុខា ហើយថា បើមេដឹកនាំប្រកាន់យកជំហរដូចមេបក្សប្រឆាំងនោះ អាចនាំប្រទេសខ្មែរទៅរកន្លែងមួយ ដែលពលរដ្ឋចង់បាន។
លោកបន្ដថា៖ «ការលាលែង ជារឿងសមស្របមួយ ហើយបើមេដឹកនាំខ្មែរ ប្រកាន់យកជំហរដូចនេះ ខ្ញុំជឿថា អាចនាំប្រទេសខ្មែរមួយ ទៅរកន្លែងដែលយើងចង់បាន ជៀសវាងការកាន់អំណាចមួយៗ ហើយមិនចង់ចុះ មិនចង់ប្រគល់ឲ្យគេ នោះវាជារឿងពិបាកសម្រាប់អ្នកដឹកនាំខ្មែរយើង»។
កាលពីថ្ងៃព្រហស្បតិ៍ម្សិលមិញនេះ នាយករដ្ឋមន្ដ្រីកម្ពុជា លោក ហ៊ុន សែន ដែលកាន់អំណាចជាង៣០ឆ្នាំមកនោះ បានប្រកាសថា បើមានការផ្ទេរអំណាច គឺមានតែផ្ទេរឲ្យទៅកូនចៅ នៃគណបក្សរបស់លោក មិនមែនផ្ទេរឲ្យទៅគណបក្សប្រឆាំងនោះទេ៕