ប្រជាពលរដ្ឋក្មេងចាស់ប្រមាណជិត១០០ នាក់ នៅខេត្តក្រចេះបានពុលនំបុ័ងបណ្ដាលឲ្យមានអាការៈពុល ក្អួត ចង្កោ ត្រូវបានកម្លាំងសមត្ថកិច្ចបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តក្រចេះ។
តាមការចុះផ្សាយរបស់អគ្គស្នងការនគរបាលជាតិបានឲ្យដឹងថានៅថ្ងៃទី២៥ ខែឧសភា មានករណីពលរដ្ឋរួមទាំងកុមារសរុបចំនួន ៧៥នាក់បានមានអាការៈ ពុល ក្អួត ចង្អោ នៅចំនុចត្រពាំងត្រាំង ភូមិកសាង ឃុំចង្ក្រង់ ស្រុកចិត្របុរី ខេត្តក្រចេះ ហើយត្រូវបានបញ្ជូនទៅមន្ទីរពេទ្យបង្អែកខេត្តក្រចេះ៤០នាក់ និង ៣៥នាក់ ទៀតត្រូវបានបញ្ជូនទៅមណ្ឌលសុខភាព ។
តាមប្រភពដដែលឲ្យដឹងទៀតថាកាលពីថ្ងៃសុក្រម្សិលមិញមានក្រុមហ៊ុនរបស់កូរ៉េដែលទទួលទិញដំឡូងមីបានចុះទៅផ្សព្វផ្សាយនៅទីតាំងខាងលើហើយបានទិញនំប៉័ងទៅចែកជូនប្រជាពលរដ្ឋ រហូតដល់ពេលល្ងាចស្រាប់តែមានអាការៈពុល ក្អួត ចង្កោរនេះកើតឡើង។ បច្ចុប្បន្នសមត្ថកិច្ចកំពុងធ្វើការស្រាវជ្រាវដើម្បីរកមូលហេតុពិតនៃការពុលនេះ។
ទាក់ទងនឹងករណីពុលនេះកាលពីថ្ងៃទី៧ ខែ ឧសភា ពលរដ្ឋនៅស្រុកចិត្របុរី ក្រចេះចំនួន ២៣៤នាក់ត្រូវបញ្ជូនទៅសង្គ្រោះនៅមន្ទីរពេទ្យក្នុងនោះ១៣នាក់បានស្លាប់។ ក្រោយមករដ្ឋបាលខេត្តក្រចេះបានសន្និដ្ឋានថា មកពីស្រាសមានជាតិមេតាណុលខ្ពស់ និងទឹកព្រែកទេរដែលពលរដ្ឋប្រើប្រាស់មានជាតិក្រូម។
