រដ្ឋាភិបាលបានចាត់ឲ្យក្រសួង ស្ថាប័ន និងភាគីពាក់ព័ន្ធឲ្យរៀបចំប្រារព្ធទិវាកុមារអន្តរជាតិ ១ មិថុនា ទិវាពិភពលោកប្រឆាំងពលកម្មកុមារ ១២ មិថុនា និងទិវាកុមារកម្ពុជា ដើម្បីរំលឹកដល់ការអនុវត្តសិទ្ធិមូលដ្ឋានរបស់កុមារ។
បើតាមសារាចរណរបស់រដ្ឋាភិបាលកម្ពុជាចុះថ្ងៃទី ២៤ ខែ ឧសភា ស្ដីពីការចាត់តាំងខួបលើកទី៦៩ ទិវាកុមារអន្តរជាតិ ១មិថុនា ខួបលើកទី ១៧ ទិវាពិភពលោកប្រឆាំងពលកម្មកុមារ ១២ មិថុនា និង ទិវាកម្ពុជាកម្ពុជា ២០១៨ ក្រោមប្រធានបទ«រួមគ្នាការពារកុមារដើម្បីអភិវឌ្ឍគ្រួសារ និង សង្គមជាតិ» និង«ប្រធានបទទប់ស្កាត់គ្រោះថ្នាក់ការងារ និងភាពងាយរងគ្រោះផ្នែកសុខភាពសម្រាប់កម្មករនិយោជិតវ័យក្មេងដើម្បីលុបបំបាត់ពលកម្មកុមារ»។
ក្នុងសារាចរនោះរដ្ឋាភិបាលកម្ពុជាបានលើកឡើងថាការចាត់ឲ្យរៀបចំនឹង ប្រារព្ធទិវាទាំងនោះគឺដើម្បីរំលឹកដល់ការអនុវត្តន៍សិទ្ធិជាមូលដ្ឋានរបស់កុមារ និងបង្ហាញការយកចិត្តទុកដាក់ចំពោះកុមារ ស្របតាមរដ្ឋធម្មនុញ្ញ អនុសញ្ញាស្ដីពីសិទ្ធិកុមាររបស់អង្គការសហប្រជាជាតិ និងអង្គការពលកម្មអន្តរជាតិស្ដីពីការហាមប្រាម និង សកម្មភាពបន្ទាន់សម្រាប់លុបបំបាត់ទម្រង់ធ្ងន់ធ្ងរនៃពលកម្មកុមារ។
តាមសារាចរដដែលនោះ រដ្ឋាភិបាលបានឲ្យក្រុមប្រឹក្សាជាតិដើម្បីកុមារ និង ក្រសួង ស្ថាប័នពាក់ព័ន្ធ រួមជាមួយគណកម្មការរៀបចំបុណ្យជាតិ អន្តរជាតិ និងសាលារាជធានីភ្នំពេញសហការគ្នារៀបចំមីទ្ទិញថ្នាក់ជាតិ និង រៀបចំកម្មវិធីកម្សាន្តផ្សេងៗសម្រាប់កុមារនៅភ្នំពេញ។
ជាមួយគ្នានោះរដ្ឋាភិបាលក៏បានចាត់ឲ្យក្រសួងព័ត៌មានសហការជាមួយក្រុមប្រឹក្សាជាតិកម្ពុជាដើម្បីកុមារណែនាំឲ្យប្រព័ន្ធឃោសនារដ្ឋ និង ឯកជនធ្វើការផ្សព្វផ្សាយឲ្យបានទូលំទូលាយដល់សង្គមជាតិទាំងមូលជ្រួតជ្រាបពីប្រវត្តិនៃទិវាកុមារអន្តរជាតិ ទិវាកុមារកម្ពុជា និងទិវាពិភពលោកប្រឆាំងពលកម្មកុមារផងដែរ។
បន្ថែមលើនោះរដ្ឋាភិបាលក៏ចាត់ឲ្យគ្រប់ក្រសួង ស្ថាប័ន រាជធានី ខេត្តរៀបចំពិធីជួបសំណេះសំណាលជាមួយកុមារ រៀបចំកម្មវិធីកម្សាន្តសប្បាយរបស់កុមារ នៅតាមស្ថប័ន គ្រឹស្ថានសិក្សារដ្ឋ ឯកជន អង្គការ មិនមែនរដ្ឋាភិបាល និងគ្រប់មណ្ឌលកុមារកំព្រា នៅមូលដ្ឋានរៀងៗខ្លួនផងដែរ។
លើសពីនោះរដ្ឋាភិបាលក៏ចាត់ឲ្យក្រសួង ស្ថាប័ន រាជធានីខេត្ត ឬគ្រឹះស្ថានពាក់ព័ន្ធទាំងអស់រៀបចំចងបដា ពាក្យស្លោក ដែលមានខ្លឹមសារទាក់ទងនឹងការលើកកម្ពស់សិទ្ធិកុមារ និង ឧត្ដមប្រយោជន៍សម្រាប់កុមារ ដើម្បីអបអរសាទរទិវានេះកុមារអន្តរជាតិ ទិវាកុមារកម្ពុជា និង ទិវាពិភពលោកប្រឆាំងពលកម្មកុមារនេះផងដែរ៕
