អតីតថ្នាក់ដឹកនាំជាន់ខ្ពស់គណបក្សប្រឆាំង អះអាងថា ការបង្កើតគណបក្សថ្មី ដោយកូនប្រុសរបស់លោក គឺជាផ្នែកមួយជួយឲ្យអតីតគណបក្សសង្គ្រោះជាតិចូលរួមប្រកួតប្រជែងការបោះឆ្នោតថ្នាក់ជាតិខាងមុខឡើងវិញ។
ការអះអាងនេះ ធ្វើឡើងបន្ទាប់ពីលោក គង់ មុនីកា ដែលជាកូនប្រុសពៅរបស់លោក គង់ គាំ បានដាក់លិខិតមួយទៅក្រសួងមហាផ្ទៃកាលពីម្សិលមិញ ស្នើសុំបង្កើតគណបក្សថ្មីឈ្មោះ «គណបក្សឆន្ទៈខ្មែរ» ដើម្បីចូលរួមប្រកួតប្រជែងការបោះឆ្នោតជាមួយបក្សកាន់អំណាច ។
អតីតមេដឹកនាំគណបក្ស សម រង្ស៊ី គឺលោក គង់ គាំ ប្រាប់VODនៅថ្ងៃនេះថា ការបង្កើតបក្សថ្មីនេះ ជាផ្នែកមួយ ដែលអាចជួយឲ្យគណបក្សសង្គ្រោះជាតិមានឱកាសចូលរួមប្រកួតប្រជែងនយោបាយជាមួយបក្សកាន់អំណាចនិងបក្សនយោបាយផ្សេងៗទៀត។
លោកថ្លែងថា «គណបក្សឆន្ទៈខ្មែរ គេបានបញ្ជាក់ថា គេជាប៉ូលដាច់ដោយឡែកពីគណបក្សសង្គ្រោះជាតិ មិនមានន័យថា បំបាត់គណបក្សសង្គ្រោះជាតិ មិនមានន័យថា បំបែកគណបក្សសង្គ្រោះជាតិទេ មានតែជួយគណបក្សសង្គ្រោះជាតិ ហើយគាំទ្រគណបក្សសង្គ្រោះជាតិឲ្យមានដំណោះស្រាយ ហើយនឹងបានចូលរួមបោះឆ្នោត»។
ប៉ុន្តែ លោក គង់ គាំ មិនបានបញ្ជាក់លម្អិតបន្ថែមនោះទេ នៅពេលវីអូឌីសួរថា តើគណបក្សថ្មីនេះ នឹងជួយអតីតគណបក្សសង្គ្រោះជាតិ ដែលត្រូវបានរំលាយ ឲ្យចូលរួមដំណើរការបោះឆ្នោតឡើងវិញតាមវិធីណា។
វីអូឌី បានព្យាយាមទាក់ទងទៅថ្នាក់ដឹកនាំជាន់ខ្ពស់អតីតគណបក្សសង្គ្រោះជាតិជាច្រើន ប៉ុន្តែរហូតមកដល់ពេលនេះ នៅមិនទាន់អាចសុំប្រតិកម្មតបណាមួយបាននៅឡើយទេ។
ទោះជាយ៉ាងណា អនុប្រធានគណបក្សសង្គ្រោះជាតិ ដែលត្រូវបានរំលាយ លោក អេង ឆៃអ៊ាង ត្រូវបានវិទ្យុអាស៊ីសេរីដកស្រង់សម្តីកាលពីថ្ងៃទី២៦ខែមេសាថា ការបង្កើតបក្សថ្មីរបស់កូនប្រុសលោក គង់ គាំ ទំនងជាទៅសង្គ្រោះគ្រួសារ ឬ ទ្រព្យសម្បត្តិច្រើនជាង។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា វិភាគថា ការបង្កើតបក្សថ្មីរបស់កូនប្រុសលោក គង់ គាំ នេះអាចគ្រាន់តែជាការលម្អប្រជាធិបតេយ្យនៅកម្ពុជាតែប៉ុណ្ណោះ។
លោកវិភាគថា៖ «ការបង្កើតនេះ វាស្របទៅតាមចិត្តគំនិតរបស់គណបក្សកាន់អំណាចចង់បាន មានបក្សកាន់តែច្រើន កាន់តែស្វាគមន៍ ជាពិសេសបក្សដែលបង្កើតចេញពីគណបក្សប្រឆាំង ព្រោះវាជារូបភាពមួយ ប៉ុន្តែកាលណាគណបក្សប្រឆាំងបែកសំឡេងកាន់តែច្រើន មានន័យថាមិនមានលទ្ធភាពមកដណ្តើមការប្រកួតប្រជែងជាមួយគណបក្សកាន់អំណាចបានទេ»។
បើតាមលោក គង់ គាំ កូនប្រុសពៅ គឺលោក គង់ មុនីកា ស្ថាបនិក៧រូប និងសមាសភាពអ្នកចូលរួមបង្កើតប្រមាណ៨០រូប បានធ្វើលិខិតមួយដាក់ទៅក្រសួងមហាផ្ទៃកាលពីម្សិលមិញ ដើម្បីសុំបង្កើតគណបក្សថ្មីមួយឈ្មោះថា «គណបក្សឆន្ទៈខ្មែរ» ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ក្រសួងបានទទួលលិខិតរបស់កូនប្រុសលោក គង់ គាំ រួចហើយកាលពីម្សិលមិញ ដោយថាក្រសួងកំពុងឲ្យស្ថាប័នជំនាញសិក្សាផ្លូវច្បាប់ មុននឹងសម្រេចឲ្យចុះបញ្ជីឲ្យគណបក្សនេះ។
អគ្គលេខាធិការរង គ.ជ.ប លោក សោម សូរីដា មានប្រសាសន៍ថា កូនប្រុសលោក គង់ គាំ ដែលស្នើសុំបង្កើតគណបក្សថ្មី នោះ ហាក់មានភាពយឺតយ៉ាវបន្តិច ខណៈការបោះឆ្នោតថ្នាក់ជាតិមកដល់។
លោកថា៖ «គ.ជ.ប ស្វាគមន៍គ្រប់គណបក្សនយោបាយ ដែលបានចុះបញ្ជីគណបក្សនយោបាយនៅក្រសួងមហាផ្ទៃ គឺមានសិទ្ធិទៅចុះបញ្ជីគណបក្សនយោបាយនៅគ.ជ.ប ដើម្បីចូលរួមប្រកួតប្រជែងការបោះឆ្នោតនាពេលខាងមុខនេះ»។
បើតាមក្រសួងមហាផ្ទៃ ការចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតជ្រើសរើសតំណាងរាស្ត្រនីតិកាលទី៦ ឆ្នាំ២០១៨ នឹងចាប់ផ្តើមឡើងពីថ្ងៃទី៣០ខែមេសាឆ្នាំ២០១៨ ដល់ថ្ងៃទី១៤ខែឧសភា ឆ្នាំ២០១៨។
បើតាមប្រតិទិន គ.ជ.ប ការបោះឆ្នោតជ្រើសរើសតាំងតំណាងរាស្ត្រអាណត្តិទី៦ នឹងប្រព្រឹត្តិទៅនៅថ្ងៃទី២៩ខែកក្កដា ខណៈស្ថានការនយោបាយនៅកម្ពុជា ហាក់នៅមិនទាន់មានភាពច្បាស់លាល់ និងស្របពេលសហគមជាតិនិងអន្តរជាតិ ព្រមានពីការដើរថយក្រោយនៃដំណើរការលទ្ធិប្រជាធិបតេយ្យនៅកម្ពុជា ក្រោយមានការរំលាយអតីតគណបក្សសង្គ្រោះជាតិ ការឃុំខ្លួនអ្នកនយោបាយ និងសកម្មជនសិទ្ធិមនុស្សនានា៕
