សមត្ថកិច្ចអះអាងថាកម្មករចំនួន៣៥នាក់បានរងបួសធ្ងន់និងស្រាល ក្នុងហេតុការណ៍ក្រឡាប់រថយន្តដឹកកម្មករនៅក្នុងសង្កាត់បាក់ខែង ខណ្ឌជ្រោយចង្វារនៅព្រឹកនេះ។
អធិការរងនគរបាលខណ្ឌជ្រោយចង្វារ លោក មៀច ហុង បានឲ្យដឹងថា ហេតុការណ៍ក្រឡាប់រថយន្តនេះបានកើតឡើងនៅម៉ោង៦និង៣០នាទីព្រឹក នៅក្នុងសង្កាត់បាក់ខែង ត្រង់ចំណុចស្ពានទី៩ ខណៈដែលរថយន្តនោះដឹកកម្មករចំនួន៦០នាក់ពីស្រុកមុខកំពូល ខេត្តកណ្តាល មកធ្វើការនៅរោងចក្រដេរខោខូវប៊ូយនៅក្នុងខណ្ឌជ្រោយចង្វារ។ លោកបានឲ្យដឹងថាអ្នករបួសទាំង៣៥នាក់នោះជាស្ត្រីទាំងអស់ ហើយរបូសធ្ងន់មាន២០នាក់ ក្នុងនោះមានស្ត្រីពោះធំ២នាក់ផងដែរ។
លោកថាមូលហេតុដែលបណ្តាលឲ្យរថយន្តក្រឡាប់នេះ គឺបណ្តាលមកពីម្ចាស់រថយន្តដឹកកម្មករបើកវ៉ាគេចម៉ូតូកង់បី។
បើតាមលោក មៀច ហុង នៅពេលនេះអ្នករបូសទាំង៣៥នាក់ត្រូវបានបញ្ជូនទៅកាន់មន្ទីរពេទ្យកាល់ម៉ែត្រ ដើម្បីសម្រាកព្យាបាល ខណៈដែលសមត្ថកិច្ចកំពុងស្វែងរកឃាត់ខ្លួនអ្នកបើកបរដែលបានរត់គេចខ្លួន៕