មន្ត្រីសិទ្ធិមនុស្សអាដហុក៤រូប និងមន្ត្រីគ.ជ.បមួយរូប ដែលកំពុងជាប់ឃុំបណ្តោះអាសន្ន ត្រូវបានជ្រើសរើសនិងជាប់ក្នុងបញ្ជីឈ្មោះពានរង្វាន់អន្តរជាតិមួយក្នុងឆ្នាំ២០១៧នេះ សម្រាប់កិច្ចការងារអ្នកការពារសិទ្ធិមនុស្ស ដែលប្រឈមនឹងហានិភ័យខ្ពស់ នេះបើតាមសេចក្តីប្រកាសព័ត៌មាន។
នៅក្នុងសេចក្តីប្រកាសព័ត៌មាន កាលពីថ្ងៃទី២៦ខែមេសា ក្រុមគណៈវិនិច្ច័យ នៃពានរង្វាន់ ម៉ាទីន អ៊ែនណល (Martin Ennals Award ) ឆ្នាំ២០១៧ បានជ្រើសរើសអ្នកការពារសិទ្ធិមនុស្សកម្ពុជាចំនួន៥រូប រួមទាំងអ្នកការពារសិទ្ធិមនុស្ស២រូបផ្សេងទៀតមកពីប្រទេស អ៊ែល ហ្សាវ៉ាឌើ (El Salvador) និងប្រទេសអេហ្ស៊ីប ឱ្យចូលរួមក្នុងវគ្គផ្តាច់ព្រ័ត្រ។
ពានរង្វាន់ ម៉ាទីន អ៊ែនណល នេះ ត្រូវបានផ្ដល់ជារៀងរាល់ឆ្នាំ ចំពោះអ្នកការពារសិទ្ធិមនុស្សឆ្នើមដែលបានលះបង់និងប្តេជ្ញាចិត្តយ៉ាងជ្រាលជ្រៅ ដោយហ៊ានប្រឈមនឹងហានិភ័យផ្ទាល់ខ្លួនយ៉ាងខ្លាំងដើម្បីជំរុញឲ្យមានការគោរពសិទ្ធិមនុស្សក្នុងប្រទេសរបស់ខ្លួន។
បើតាមសេចក្តីប្រកាស ពានរង្វាន់ ម៉ាទីន អ៊ែនណល នឹងត្រូវប្រកាសជាផ្លូវការក្នុងវគ្គផ្តាច់ព្រ័ត្រនៅថ្ងៃទី១០ខែតុលាឆ្នាំ២០១៧ខាងមុខ នៅឯទីក្រុងក្រុងហ្សឺណែវនេះ។
អ្នកការពារសិទ្ធិមនុស្ស៥នាក់ បានស្ថិតក្រោមការឃុំខ្លួនបណ្តោះអាសន្នអស់រយៈពេលជិតមួយឆ្នាំហើយ ដែលការជាប់ឃុំនេះ ត្រូវបានស្ថាប័នអន្តរជាតិនានា ស្នើម្តងហើយម្តងទៀតឲ្យដោះលែងពួកគាត់ជាបន្ទាន់ និងដោយគ្នានលក្ខខណ្ឌ ហើយត្រូវបញ្ឈប់ការយាយីផ្នែកតុលាការ ទៅលើអ្នកការពារសិទ្ធិមនុស្ស។
មន្ត្រីការពារសិទ្ធិមនុស្សអាដហុក៤រូបគឺ លោក នី សុខា លោក យី សុខសាន្ត លោក ណៃ វ៉ងដា និងលោកស្រី លឹម មុនី និងមន្ត្រីគ.ជ.ប លោក នីចរិយា ត្រូវបានតុលាការរាជធានីភ្នំពេញសម្រេចឃុំខ្លួន កាលពីដើមខែឧសភាឆ្នាំ២០១៦ ក្រោមការចោទប្រកាន់ពីបទសូកប៉ាន់សាក្សីពាក់ព័ន្ធជុំវិញសំនុំរឿងអាស្រូវលោក កឹម សុខា៕
