ខុទ្ទកាល័យប្រធានសភាលោក ហេង សំរិនបានស្នើឲ្យអាជ្ញាធរចាត់ការតាមផ្លូវច្បាប់ ចំពោះជន២រូប ដែលថា បានបន្លំប្រើឈ្មោះជាទីប្រឹក្សារបស់លោក ក្នុងបំណងធ្វើសកម្មភាពទុច្ចរិត។
ខុទ្ទកាល័យលោក ហេង សំរិន បានចេញសេចក្ដីប្រកាសព័ត៌មានមួយចុះថ្ងៃទី២៧ ខែមេសា បានលើកឡើងថាមានជនឈ្មោះ អាំ ផល្លីន និង ឈ្មោះ ហ៊ាង គន្ធី បានយកឈ្មោះលោក ហេង សំរិន ទៅប្រើប្រាស់ ក្នុងគ្រប់ទង្វើទុច្ចរិត ដែលនាំឲ្យប៉ះពាល់ដល់កិត្តិយសរបស់ថ្នាក់ដឹកនាំ។
ខុទ្ទកាល័យលោក ហេង សំរិន បានថ្កោលទោស និងបដិសេធថាជនទាំងពីរនាក់នោះមិនមែនជាទីប្រឹក្សារបស់ប្រធានសភាលោក ហេង សំរិននោះ ហើយក៏អំពាវនាវឲ្យអាជ្ញាធរមានសមត្ថកិច្ចចាត់វិធានការតាមផ្លូវច្បាប់ជាធរមាន ឲ្យបានតឹងរឹងបំផុតផងដែរ។
ក្នុងសេចក្ដីប្រកាសព័ត៌មាន ដដែលនោះមិនបានបញ្ជាក់ច្បាស់ទេ ថាជនទាំងពីរនាក់នោះបានប្រើឈ្មោះជាទីប្រឹក្សាលោក ទៅប្រព្រឹត្តអំពើអាក្រក់អ្វីនោះទេ។
ប៉ុន្តែសារព័ត៌មាន swiftnews បានផ្សាយថាកាលពីថ្ងៃទី ២១ ខែមេសា កន្លងទៅ ឈ្មោះអាំ ផល្លីន និង ហ៊ាង គន្ធី ជាមន្រ្តីយោធា បានប្រើឈ្មោះជាទីប្រឹក្សាលោក ហេង សំរិន បញ្ជាឲ្យកម្មកររបស់ខ្លួនជាង ២០ នាក់ ទៅកាប់បំផ្លាញដំណាំរំលោភបំពានយកដីពលរដ្ឋស្ថិតក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។
ទោះបីជាយ៉ាងណានៅថ្ងៃទី ២៧ ខែ មេសាដដែលនោះជនទាំង ២នាក់ឈ្មោះ អាំ ផល្លីន និង ហ៊ាង គន្ធីជាប្រពន្ធ បានចេញលិខិតបំភ្លឺរួមគ្នាមួយ បដិសេធទៅនឹងការចោទប្រកាន់នេះ៕