គណបក្សអំណាចខ្មែរ បានប្រកាសថាខ្លួនមិនចូលរួមក្នុងការបោះឆ្នោតនៅខែ កក្ដដាខាងមុខទេដោយថាស្ថានការណ៍នយោយនៅកម្ពុជាគ្មានស្ថិរភាព ហើយសមាសភាពចាត់តាំងរបស់ គ.ជ.ប គ្មានសុក្រិត្យភាពលំអៀងទៅខាងរដ្ឋាភិបាល។
គណបក្សអំណាចខ្មែរបានចេញសេចក្ដីប្រកាសព័ត៌មានមួយចុះថ្ងៃទី ២៧ ខែមេសា ស្ដីពីជំហរមិនចូលរួមការបោះឆ្នោតជ្រើសតាំងតំណាងរាស្រ្តនីតិកាលទី ៦ ដោយគណបក្សមួយនេះបានប្រកាសមិនចូលរួមដាច់ខាត ព្រោះថាការបោះឆ្នោតនេះមានអាជ្ញាកណ្ដាល (គ.ជ.ប) មិនឯករាជ្យ។
គណបក្សអំណាចខ្មែរក៏បានលើកឡើងបន្តថាបញ្ហានយោបាយនៅកម្ពុជាគ្មានស្ថិរភាព ការជ្រើសតាំងសមាសភាព គ.ជ.ប គ្មានសុក្រិតភាព បន្ទាប់ពីរដ្ឋាភិបាលធ្វើវិសោធនកម្មច្បាប់ដកហូតអាសនៈ បញ្ចូលអាសនៈដែលផ្ទុយពីខ្លឹមសារដើមនៃច្បាប់ និង ឆន្ទៈប្រជាពលរដ្ឋ។
គណបក្សមួយនេះបានចាត់ទុកស្ថានការណ៍នយោបាយនៅកម្ពុជាគ្មានស្ថិរភាពបន្ទាប់ពីរដ្ឋាភិបាលចាប់ឃុំខ្លួនប្រធានគណបក្សសង្គ្រោះជាតិលោក កឹម សុខា និងការរំលាយបក្សប្រឆាំងដ៏ធំមួយនេះ ហើយបែងចែកអសនៈទាំង៥៥ ទៅឲ្យបក្សតូចៗដែលមិនទទួលបានការបោះឆ្នាំគាំទ្រពីពលរដ្ឋកាលពីបោះឆ្នោតជាតិឆ្នាំ ២០១៣។
ក្រោយការរំលាយគណបក្សសង្គ្រោះជាតិ ដែលមានអ្នកគាំទ្រជិតពាក់កណ្ដាលប្រទេស កាលពីខែវិច្ឆិកាឆ្នាំមុននោះ រដ្ឋាភិបាលរបស់លោក ហ៊ុន សែន បានទទួលថ្កោលទោសយ៉ាងខ្លាំងពីសហគមន៍អន្ដរជាតិ។ ក្នុងនោះ សហរដ្ឋអាមេរិក និងសហភាពអឺរ៉ុប បានព្រមានដាក់ទណ្ឌកម្មទាំងផ្នែកសេដ្ឋកិច្ច និងការទូត ដោយថា កម្ពុជា បានដើរចេញពីគន្លងប្រជាធិបតេយ្យ និងរំលោភសិទ្ធិពលរដ្ឋធ្ងន់ធ្ងរ៕
បច្ចប្បន្នអតីតប្រធានគណបក្សចំនួនបីកំពុងជាប់ពន្ធនាគារគឺលោក លោក កឹម សុខា អតីតប្រធានគណបក្សសង្គ្រោះជាតិ លោក ញឹក ប៊ុនឆៃ អតីតប្រធានគណបក្សខ្មែររួបរួមជាតិនិង លោក សួន សេរីរដ្ឋា អតីតប្រធានគណបក្សអំណាចខ្មែរ។
