រដ្ឋាភិបាល ព្រមានចាត់វិធានការទៅលើក្រុមហ៊ុនទូរសព្ទទាំងឡាយណា ដែលកាត់ទឹកប្រាក់អ្នកប្រើប្រាស់ខុសពីធម្មតា ដោយពុំបានជូនដំណឹងពីមូលហេតុនៃការកាត់នោះទៅអ្នកប្រើប្រាស់។
ក្នុងលិខិតមួយចុះថ្ងៃទី២៧មិថុនា ជម្រាបទៅកាន់ម្ចាស់ក្រុមហ៊ុនទូរសព្ទចល័តទាំងអស់ ទូរគមនាគមន៍កម្ពុជាបានឲ្យដឹងថា ដោយសារតែបច្ចុប្បន្នមានអ្នកប្រើប្រាស់ទូរសព្ទចល័តជាច្រើនបានរអ៊ូរទាំនិងខឹងសម្បា ទៅលើក្រុមហ៊ុនទូរសព្ទ ដែលបានកាត់ទឹកប្រាក់ពួកគាត់ខុសពីធម្មតា ដោយពុំមានសារ SMS ជូនដំណឹងឬមិនផ្តល់កូដ ឬព័ត៌មានពីការផ្តាច់គម្រោងសេវា។
ទូរគមនាគមន៍បានណែនាំថា ដើម្បីជៀសវាងបញ្ហានេះ ក្រុមហ៊ុនទូរសព្ទចល័តនៅកម្ពុជាទាំងអស់គួរផ្តល់ព័ត៌មានឬទទួលការបានការឯកភាពពីអ្នកប្រើប្រាស់ជាមុន ក្នុងការផ្តល់គម្រោងខ្ចីលុយ ក្រុមហ៊ុនគួរជូនដំណឹងពីការការណែនាំលំអិត ស្តីពីការភ្ជាប់សេវា និងការផ្តាច់សេវានានា ដូចជា Call tune, Miss call Alert ជាដើម និងត្រូវផ្សព្វផ្សាយជាសាធារណៈនូវវិធីភ្ជាប់ និងវិធីផ្តាច់សេវាឲ្យបានច្បាស់លាស់ដល់អតិថិជន។
ទូរគមនាគមន៍ បានស្នើឲ្យម្ចាស់ក្រុមហ៊ុនទូរសព្ទចល័តទាំងអស់ ពិនិត្យឡើងវិញរាល់សេវាពាក់ព័ន្ធ នឹងការកាត់ប្រាក់នេះ ហើយអនុវត្តន៍តាមការណែនាំរបស់ខ្លួន ដោយថា នឹងចាត់វិធានការប្រសិនជាក្រុមហ៊ុនណាមួយមិនអនុវត្តតាមការណែនាំនេះ៕
