មន្ត្រីការទូតកំពូល និង ជារដ្ឋមន្ត្រីការបរទេសចិនលោក Wang Yi នឹងទៅបំពេញទស្សនកិច្ចក្នុងប្រទេសកូរ៉េខាងជើងក្នុងសប្តាហ៍នេះ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ដែលបានស្រង់សម្តីអ្នកនាំពាក្យក្រសួងការបរទេសចិនលោក Lu Kan មកចុះផ្សាយនៅថ្ងៃចន្ទទី៣០មេសានេះ។
បើតាមរ៉យទ័រ ដំណើរទស្សនកិច្ចនេះ នឹងធ្វើឡើងនៅថ្ងៃពុធនិងថ្ងៃព្រហស្បត្តិ៍។
ទីភ្នាក់ងារសារព័ត៌មានរ៉យទ័រ បានបន្តថា ដំណើរទស្សនកិច្ចរបស់មេដឹកនាំកំពូលចិន ធ្វើឡើងបន្ទាប់ពីក្តីសង្ឃឹមមួយបានរីកចម្រើនកាលពីសប្តាហ៍មុន ដើម្បីនាំមកនូវសន្តិភាពដល់ឧបទ្វីបកូរ៉េ និងបន្ទាប់ពីជំនួបកំពូលជាប្រវត្តិសាស្ត្ររវាងមេដឹកនាំកូរ៉េខាងជើងលោក គីម ជុងអ៊ុន និងប្រធានាធិបតីកូរ៉េខាងត្បូង លោក ម៉ូន ជេអ៊ីន ដែលអ្នកទាំងពីរបានប្តេជ្ញាថា នឹងបញ្ចប់កម្មវិធីអាវុធនុយក្លេអ៊ែរ។
កាលពីថ្ងៃអាទិត្យ ការិយាល័យរបស់ប្រធានាធិបតីកូរ៉េខាងត្បូង បាននិយាយថា លោក គីម ជុងអ៊ុន បានប្រាប់លោក ម៉ូន ថា លោកនឹងបិទកន្លែងធ្វើតេស្តនុយក្លេអ៊ែររបស់កូរ៉េខាងជើង នៅខែឧសភា៕
